XORAZM

“Хоразм” (собиқ “Олимпия”) стадиони Урганч шаҳридаги шу номли спорт мажмуасининг таркибий қисмларидан бири бўлиб, мажмуа таркибига 2003 йилда киритилган. Маълумки, шу йили Урганч шаҳрида мактаб ўқувчиларининг “Умид ниҳоллари” республика мусобақаси ўтказилганди. “Хоразм” спорт мажмуаси айнан шу мусобақа олдидан қуриб битказилган, собиқ “Олимпия” стадиони эса янгидан реконструкция ва таъмир қилинган ҳамда “Хоразм” стадиони, - деб атала бошланган. Бундан ташқари, 2003 йилда стадион “Хоразм” спорт мажмуаси билан биргаликда вилоят Маданият ва спорт ишлари бошқармаси балансига ўтказилган.   

“Хоразм” (собиқ “Олимпия”) стадиони 1983 йилда барпо этилган. Ўша пайтда стадион ўз бағрига 30 минг томошабинни сиғдирган. 2003 йилда Урганчда ўтказилган “Умид ниҳоллари” республика мусобақаси олдидан стадион бош архитектор Михаил Гершевич Бурлаков лойиҳаси асосида қайтадан реконструкция қилинган ва таъмирланган: трибуналардаги эски тахта ўриндиқлар ўрнига пластмасса курсилар, эски механик табло ўрнига янги электрон табло ўрнатилган. Бундан ташқари, стадионнинг усти осма том билан ёпилган, томга янги, замонавий  ёритгичлар ўрнатилган, эски минорали ёритгичлар эса олиб ташланган. 

Бугунги кунда “Хоразм” стадиони 13500 томошабинни сиғдиради. Ундаги футбол майдонининг ўлчами 104Х67 метрни ташкил қилади. Стадиондаги футбол майдонини ёритувчи прожекторларнинг ёритиш даражаси эса 1 квадрат метрга 500 люксни ташкил қилади.   

Хоразм вилояти маъмурий маркази Урганч шаҳрининг айни пайтда “Хоразм” номи билан аталиб келинаётган футбол клуби 1993 йилда “Динамо” номи остида ташкил қилинган бўлиб, собиқ Иттифоқ таркибидаги Ўзбекистон ССР чемпионатида иштирок қилган аввалги “Шёлковик” (ўтган асрнинг 60-чи йиллари), “Спартак” (70-чи йиллар), “Қурувчи” (80-чи йиллар) ва “Жайхун” клубларининг издошидир. “Динамо”нинг таъсичиси ва илк хомийси Хоразм вилояти ички ишлар бош бошқармаси бўлган. 

1993 йили жамоа мустақил Ўзбекистоннинг иккинчи лигасида (Хоразм вилояти чемпионатида) иштирок қилиб, чемпионликни қўлга киритган. Орадан бир йил ўтиб, яъни 1994 йили ўтказилган биринчи лигага ўтиш турнирида (“пулькада”) “Хоразм” муваффақиятли иштирок қилиб, юқори лигага йўл олган. 1995 йили бўлиб ўтган биринчи лига ўйинларида чемпионликни қўлга киритган ва Ўзбекистон олий лигасига йўл олган. “Хоразм”нинг ҳозирги логотипида айнан ўша 1995 йил, яъни жамоанинг Ўзбекистон биринчи лигасида чемпион бўлиб, олий лигасида иштирок қилиш ҳуқуқини қўлга киритган йили йили кўрсатилган. 

1996 йилдан бошлаб клуб вилоят хокимияти тасарруфига ўтказилиб, унга “Хоразм” номи берилган. 1999 йили жамоа хоразмлик мураббий Рўзмат Қурёзов бошчилигида олий лигада 7-ўринни қўлга киритган. Мана шу кўрсатгич ҳозиргача жамоанинг Ўзбекистон чемпионатларидаги энг яхши натижаси бўлиб келмоқда.  

2006 йилда “Хоразм” олий лигада ниҳоятда муваффақиятсиз иштирок қилиб, биринчи лигага тушиб кетди. Аммо орадан икки йил ўтгач, яъни 2008 йилда биринчи лигада чемпионликни қўлга киритиб, яна олий лигага чиқди. 2009 йилги чемпионатда “Хоразм” ўз олдига қўйган вазифани муваффақиятли уддалади: олий лиганинг 16 жамоаси ичида 9-чи ўринни қўлга киритди. 2010 йилнинг февраль ойида ўтказилган Ўзбекистон Профессионал футбол лигаси (ЎзПФЛ)нинг Кубогида “Хоразм” чемпионликни қўлга киритиб, ЎзПФЛ Кубогининг янги соҳибига айланди.  

“Хоразм”га турли йилларда Владимир Любушин, Александр Десятчиков, Рўзмат Қурёзов, Олег Тюлькин, Қувват Туреев ва Ўзбекистоннинг бошқа таниқли мутахассислари устозлик қилишган. Айни пайтда “Хоразм”га жамоанинг собиқ тўпурар хужумчиси Вали Султонов бош мураббийлик қилмоқда.