XORAZM

“Хоразм” футбол клубининг раҳбарияти ва мураббийлар штаби ўтган давр мобайнида давомли равишда қониқарсиз ўйин намойиш этган, етарли спорт формасига кира олмаган қатор футболчиларнинг хизматидан воз кечишга қарор қилди. Жумладан, йил бошидан бери ўзининг устида етарли даражада ишламаган, ортиқча вазнини йўқота олмаган, зарур спорт формасига кира олмаган ҳамда ўринбосарлар ўртасида ўтказилган учрашувларда жамоа мураббийларига ўринсиз эътирозлар билдиргани учун қашқадарёлик футболчи Комил Жўраевга “чиқиш” эшиклари кўрсатилди.

Бундан ташқари, асосий таркиб футболчилари ўртасида ўтказилган қатор ўйинларда тўпурарлик намойиш эта олмаган яна бир қашқадарёлик футболчи Зафар Холмуродовга ҳам “exit” эшиклари кўрсатилди. Шуни айтиш керак-ки, Зафар Холмуродов ўзининг гол ура олмаслик “қобилияти” билан нафақат “Хоразм” мухлисларини, балки клуб хомийлари, раҳбарияти ва мураббийларини ҳам хуноб қилди. Айниқса, шу йил 28 май куни Урганчда ўтказилган “Хоразм”-“Насаф” учрашувида кўрсатган “ўйини” туфайли қашқадарёлик кекса футболчи “Хоразм” марказий стадионига йиғилган мухлисларнинг оғзаки “сийловлари”ни эшитишга ҳамда баъзи жамоадошларининг жисмоний “сийловлари”дан “татиб“ кўришга мажбур бўлганди.

“Хоразм” футбол клуби рахбарияти ва мураббийлар штаби бошқа футболчиларнинг хизматларидан ҳам воз кечди. Хусусан, асосий таркиб футболчилари ўртасида ўтказилган қатор ўйинларда давомли равишда қўпол ва шубҳали хатоларга йўл қўйганликлари учун ҳимоячилар Даврон Файзиев ва Маъруф Пўлатовларга ҳам “рухсат” берилди. Бундан ташқари, тажрибали ҳимоячи Бахтиёр Ашурматов ҳали-хануз ўз жароҳатидан фориғ бўла олмаётгани сабабли, бу футболчига жароҳатини тўлиқ даволаб олгунча уйида дам олишга рухсат берилди.

Шу тариқа “Хоразм” футбол клуби Комил Жўраев, Зафар Холмуродов, Даврон Файзиев ва Маъруф Пўлатовларнинг хизматидан воз кечган бўлса, Бахтиёр Ашурматовга жароҳатини даволаб олиш учун имконият яратди.

Эслатиб ўтиш жоиз-ки, юқорида номи келтирилган ўйинчилардан ташқари, бу йилги мавсум давомида “Хоразм”дан хужумчи Рўзимбой Аҳмедов ва дарвозабон Эркин Жабборов ҳам четлатилганди. Бундан ташқари, молиявий муаммолар, яъни “кўтарма” пулларини ололмагани сабабли “Хоразм”ни грузиялик хужумчи Левани Мдивнишвили тарк этганди. Бошқа бир грузиялик футболчи Лаша Кобахидзе эса жароҳати туфайли ўз юртига кетганди. Умумлаштириб айтилса, жорий йилги чемпионат бошида “Хоразм” қайдномасига киритилган футболчилардан турли сабабларга кўра жамоани биринчи даврада тарк этган ўйинчилар рўйхати қуйидагича:

1. Лаша КОБАХИДЗЕ (жароҳат)
2. Левани МДИВНИШВИЛИ (молиявий муаммо)
3. Рўзимбой АҲМЕДОВ (четлатиш)
4. Эркин ЖАББОРОВ (четлатиш)
5. Комил ЖЎРАЕВ (четлатиш)
6. Маъруф ПЎЛАТОВ (четлатиш)
7. Даврон ФАЙЗИЕВ (четлатиш)
8. Зафар ХОЛМУРОДОВ (четлатиш)   

Шуни ҳам айтиш керак-ки, ушбу рўйхатни “Хоразм”нинг яна бир-икки футболчиси тўлдириши мумкин, яъни ўйинлардаги суст ҳаракатлари, қўпол ва шубҳали хатолари учун жамоадан четлатилиши мумкин. Жамоа мураббийлари штабининг “назари”да яна 1-2 футболчи бор, фақат ҳозирча Вали Султонов ва унинг ёрдамчилари бу футболчиларга сўнгги имконият беришни лозим топишмоқда.