XORAZM

Кеча, 24 август куни, uff.uz сайтида “Баҳром Ҳакимов: “Бобомурод Абдуллаев асосга эга эмас” сарлавҳали интервью эълон қилинди. Унда “Хоразм” бош мураббийи Баҳром Ҳакимов "Чемпион" газетасининг 24 августдаги 34 (106)-сонида чоп этилган "Универсал мураббий ва матбуот" сарлавҳали мақоламга нисбатан ўз эътирозларини билдириб: “Мақолада келтирилган фактлар ҳеч қандай исботга эга эмас. Ушбу фактларни исботлашни муаллифдан талаб қиламан... Агар муаллиф мақоладаги фактларни исботлаб бера олмаса, газетанинг навбатдаги сонида раддия эълон қилинишини сўрайман”, - дебди.

 Аввало шуни айтишим кера-ки, Баҳром Ҳакимов ўзининг: “Мақолада келтирилган фактлар ҳеч қандай исботга эга эмас”, - деган ибораси билан ушбу мақоламдаги барча (такрор айтаман, БАРЧА!!!) фактларни исботга эга эмасга чиқариб қўйган.  Чунки Баҳром Ҳакимов ҳеч бўлмаганда: “Мақолада келтирилган АЙРИМ (!!!) фактлар ҳеч қандай исботга эга эмас”, - деганда эди, Ҳакимовнинг иборасидан юқоридаги (“барча фактлар исботга эга эмас”, деган)  маъно келиб чиқмасди.  

Мен бу сўзма-сўз таҳлилни гап кавлаш ёки майдакашлик қилиш учун эмас, балки бошқа мақсадда қилдим. Чунки Баҳром Ҳакимовнинг: “Мақолада келтирилган фактлар ҳеч қандай исботга эга эмас”, - деган ибораси ва ундан келиб чиққан:  “Барча фактлар исботга эга эмас”, - деган маъно туфайли мен мақоламда келтирилган барча фактларга исбот келтиришим лозим. Бу эса, "Универсал мураббий ва матбуот" сарлавҳали мақоламни ипидан игнасигача исботлаб бериш вазифани юзага келтиради.  

Агар “Хоразм” бош мураббийи: “Мақолада келтирилган АЙРИМ (!!!) фактлар ҳеч қандай исботга эга эмас”, - деганда ва ўша айрим фактларни аниқ кўрсатганда эди, мен конкрет фактлар бўйича жавоб берардим. Лекин, қайтариб айтаман, Ҳакимов ундай йўлдан бормасдан, бутун бошли мақолани исботсизга чиқариб қўйган.  

Унинг бундай дейиши, бир томондан, менинг ишимни (аниқроғи, жавоб мақоламни) сал чўзиб юборса ҳам (ҳар ҳолда ҳамма фактни асослаш учун кўпроқ вақт ва матн талаб қилинади), бошқа томондан, Ҳакимовнинг ишини ҳам қийинлаштиради: мен атиги битта фактни асосласам ҳам, ҳақ бўлиб чиқишим аниқ. Чунки мен мақоламнинг атиги битта фактини асослаб берсам ҳам, Баҳром Ҳакимов: “Мақоладаги барча фактлар исботга эга эмас”, - деган маънода гапириб, нотўғри таъкидлаган бўлади.  

Аммо, Баҳром ака, қўрқманг – мен мақоламдаги барча фактларга исбот келтираман. Қани бўлмаса, бошладик...

Биринчидан, “Хоразм” ФК бош мураббийи талабига биноан клуб директори шу йил 10 августда чиқарган 40-К сонли буйруқ ҳақиқатдан ҳам мавжуд. Менда унинг ксеронусхаси бор. Агар ишонмасангиз, ушбу буйруқнинг сканердан чиқарилган фотонусхасини www.xorazmfk.com сайтининг “Fotogalereya” бўлимига ташриф буюриб ёки uff.uz сайтининг тегишли ҳаволасини босиб, ўз кўзингиз билан кўришингиз мумкин. 

Иккинчидан, Ўзбекистон футбол федерацияси ва Профессионал футбол лигаси чиқарган “Футбол бўйича Ўзбекистон нохаваскор футбол клублари ўртасида 2010 йилги мусобақалар РЕГЛАМЕНТИ”нинг 2-сонли иловаси ҳам ҳақиқатдан ҳам мавжуд. У ҳақиқатдан ҳам 6 банддан иборат бўлиб, мазкур Регламентнинг 40-41-чи саҳифаларида ва ЎзПФЛнинг www.pfl.uz сайтида чоп этилган. Ушбу иловани ҳам ўз кўзингиз билан ўқиб чиқишингиз мумкин.  

Учинчидан, “Хоразм” ФК бош мураббийнинг талабига биноан чиқарилган аксилрегламент буйруқдан қаттиқ таъсирланиб, Баҳром Ҳакимовга мурожаат қилганимда ушбу мураббий ҳақиқатдан ҳам менга: “Бу ерда сизнинг хизматингизга эҳтиёж йўқ! VIP-ложа аҳлига ва журналистларга бериладиган буклетларни ўзимиз сиссиз ҳам чиқараверамиз, жамоалар таркибини бу ердаги журналистларга менинг ўзим айтаман. Матбуот анжумани ташкил қилиш учун матбуот котибининг кераги ҳам йўқ, чунки журналистларнинг ўзлари келаверади ўша анжуманга. Газеталарнинг ва ПФЛнинг журналистларига эса жамоа ҳақидаги маълумотларни фақат менинг ўзим етказаман”, - деди. Ушбу суҳбат 10 август куни тушдан сўнг таҳминан 17.00-18.00 ларда “Хоразм” футбол клубининг базасига “Хоразм” стадионининг футбол майдони томондан кириш эшигининг олдида бўлиб ўтди. Билмаганлар учун маълумот: “Хоразм” ФКнинг футболчилар истиқомат қилувчи базаси “Хоразм” стадиони трибуналарининг остида жойлашган бўлиб, ушбу базага ҳам стадион ташқарисидан, ҳам ичкарисидан кириш мумкин. 

Баҳром Ҳакимовнинг мана шундай деганларига менинг гувоҳларим бор. Икки гувоҳимни ҳам, бошқа далилларимни ҳам матбуотда ошкор қилмайман, чунки, масалан, гувоҳларим Урганчда истиқомат қилишади, мен уларнинг исм-шарифларини ошкор қилсам, уларга тазйиқ ўтказилиши мумкин. Гувоҳларимни ҳам, далилларимни ҳам фақат судда ошкор қиламан.  

Баҳром Ҳакимов мени судга берсин, ўшанда кўрамиз ким нимани гапирган-у, нимани гапирмаган экан. Ҳозирча мен фақат шуни айтишим мумкин-ки, гувоҳлардан бири хуқуқшунос, бошқа гувоҳларим каторида мен уни ҳам Ҳакимов билан бўлган суҳбатга атайлаб олиб бордим: чунки Баҳром Ҳакимовнинг айтган гапларидан тонишини таҳмин қилгандим.  

Мен, Худога шукр, биринчи йил журналистлик қилаётганим йўқ. Айтган гапларидан тонадиганларнинг қанчасини кўрганман: судда аудиоёзув ва гувоҳларни келтирганда ундайларнинг попуги пасайиб қолади.  

Тўртинчидан, ОФК аъзоларидан ташкил топган махсус комиссия ростдан ҳам 4 августда Урганчда бўлиб, “Хоразм” ФКдаги аҳвол билан танишишган, VIP, CIP ва PRESS ложалар, матбуот анжуманлари хонасини кўздан кечиришган, буклетлар ва сайт масаласида клуб раҳбариятига саволлар беришган, ўз компьютерлари орқали www.xorazmfk.com сайтига ташриф буюришган. Буни исботлаш учун клуб ходимлари ва малайзиялик меҳмонлар билан бирга Урганчга ташриф буюрган ЎзПФЛ вакиллари бор. Боринг ана, улар ҳам гувоҳликдан қочиб, ўзларини четга олишса, шу текширувда қатнашган малайзияликлар бор. 

Бешинчидан, шу йилнинг 13 июнь куни мен “Хоразм” ФКнинг сайтида “Ҳайдалганлар “Хоразм”га қайтарилармиш...” сарлавҳали хабарни жойлаштириб, унда қўпол ва шубҳали хатолари учун “Хоразм”дан четлатилган баъзи футболчилар менга қўнғироқ қилиб: “Биринчи даврадан кейин “Хоразм”га янги бош мураббий келади, у бизнинг одам бўлади. Ўша янги бош мураббий бизни “Хоразм”га қайтаради. Шунда кўрсатиб қўямиз сизга интернетга мақола ёзишни!” – қабилидаги дўқ-пўписалар қилгани тўғрисида ёзгандим.  

Бу гапларимга ҳам исбот (аудиоёзув) бор. Ҳозирча мен фақат шуни маълум қилишим мумкин-ки, ўша мақола (“Ҳайдалганлар “Хоразм”га қайтарилармиш...”) www.xorazmfk.com сайтида эълон қилингач, ўша пайти “Хоразм”дан четлатилган икки футболчи қўл телефонимга қўнғироқ қилди. Биринчиси дарров мени сўкиб, ҳақорат қилишга тушди, иккинчиси эса мен билан нормал муомалада гапирди, мен билан аввалгидек сизлашиб гапирди. Лекин иккинчиси ҳам “Хоразм”га янги мураббийи келишини ва уни жамоага яна қайтаришини айтди. Ушбу икки футболчи билан телефонда бўлиб ўтган суҳбатларнинг ҳам аудиоёзувлари бор. Мен уларни фақат судда эшиттираман. 

Олтинчидан, Даврон Файзиевнинг “Хоразм”га қайтарилганига хоразмликларнинг 14 август куни Қаршида “Насаф”га ва 21 август куни Урганчда “Қизилқум”га қарши ўтказган ўйинларининг қайдномалари ва видеоёзувлари бор. Шунингдек, Даврон Файзиев боши билан рақиб футболчиси Зафар Холмуродовга пас берганига, шу пасни Холмуродов голга айлантирганига ҳам видеоёзувни кўриб, амин бўлишингиз мумкин. Бундан ташқари, Файзиевнинг ушбу хатоси ва ундан келиб чиққан гол Ўзбекистон телевидениеси “Спорт” каналининг “Футбол шарҳи” кўрсатувида ҳам намойиш этилди. 

Еттинчидан, “Хоразм”нинг янги бош мураббий ўзи билан бирга менга, менинг хизматларимга ва шаънимга нисбатан янги муносабатларни ҳам олиб келганига исбот эса – Баҳром Ҳакимовнинг талабига биноан 10 август куни “Хоразм” ФКда чиқарилган 40-К сонли буйруқ. Шуни ўз кифоя қилади исбот учун. Чунки илгари, яъни Баҳром Ҳакимов келгунга қадар клуб бундай буйруқ чиқармаганди. 

Саккизинчидан, 21 август куни Урганчда бўлиб ўтган “Хоразм”-“Локомотив” учрашувига мезбонлар матбуот котиби келмаганлиги сабабли “Хоразм” футбол клуби раҳбарияти ушбу ўйин ҳақидаги буклетни чиқармаган, учрашувга келган маҳаллий журналистлар жамоаларнинг якуний таркибини ўйин қайдномаси тузиладиган хонага кириб, учрашув назоратчисининг дафтаридан кўчириб чиқишганига далилларим ҳам, гувоҳларим ҳам бор. Гувоҳлардан бири – спорт журналисти. Уларнинг номларини ҳам матбуотда ошкор қилмайман. Агар зарур бўлса, фақат судда ошкор қиламан. 

Яна қанча исбот керак, Баҳром ака?!  

Мана, мен "Чемпион" газетасининг 24 августдаги 34 (106)-сонида чоп этилган "Универсал мураббий ва матбуот" сарлавҳали мақоламда келтирилган барча фактларга исбот ва далил келтирдим. Ушбу фактларни тасдиқловчи аудиоёзувларни ва гувоҳларнинг кўрсатмаларини, боя айтганимдек, фақат судда тақдим қиламан.  

Энди, ўз навбатида, мен ҳам Баҳром Ҳакимовдан исбот талаб қилмоқчиман. 

Биринчидан, Баҳром Ҳакимов 24 август куни uff.uz сайтига берган интервьюсида: “Мен "Хоразм"га келганимда ички муҳит яхши эмаслигини билардим. Бунда клуб матбуот котиби Бобомурод Абдуллаевнинг ҳам "ҳиссаси" бор эди”, - деган.  

Баҳром ака, клубдаги ички муҳит яхши эмаслигида менинг ҳам “ҳиссам” борлигини исботлаб беринг! Илтимос, қуруқ гаплар билан эмас, фактлар билан исботлаб беринг! Қачон, қаерда ва қай йўсинда мен клуб ички муҳитини бузишга ўз “хиссам”ни қўшибман?  

Иккинчидан, мазкур интервьюда Баҳром Ҳакимов мен ҳақимда гапираётиб: “У мағлубиятга учралган ўйинларда футболчиларни ўйинларни сотганликда ҳеч бир исботсиз ва ноҳақ айблаб, турли мақолалар ёзганди”, - деган. 

Баҳром ака, марҳамат қилиб, қачон, қайси газетада, қайси сайтда ва қайси мақолаларимда мен “Хоразм” футболчиларини ўйинларни сотганликда айблаганимни исботлаб беринг! Ва конкрет қайси футболчиларни айблаганимни ҳам кўрсатиб берасиз ва исботлайсиз энди!   

Мен сотқинлар ҳақида атиги бир мақола ёзганман, у ҳам бўлса, www.xorazmfk.com сайтидаги “Хоинларга тилаклар” мақоласи. Лекин у мақолада бутун дунё хоинларига бўлган тилаклар битилган. Унда конкрет мамлакат, футбол клуби, футболчиларнинг номлари йўқ! Агар ушбу мақолани назарда тутаётган бўлсангиз, адашасиз, Баҳром ака! Унда на сизнинг ва на футболчиларингизнинг исми-шарифи келтирилмаган-ку! Энди шу умумлаштирилиб ёзилган мақола мазмуни Сизга ёки бирон бир футболчига тегиб кетган бўлса, айб мендами?  

Қизиқ: www.xorazmfk.com сайтида “Хоинларга тилаклар” мақолам чиққач, менинг шаънимга баъзи футболчиларга қўшилиб, баъзи ўқувчилар-у мухлислар ҳам турли дашномларни қила бошлашди: қарғанибсиз, уят эмасми? ва ҳоказолар. Ҳа, энди футболчилар нега жиғибийрон бўлишини тушунаман: гап эгасини топган, демак, хоинликка қандайдир алоқаси бор. Аммо мухлис ва ўқувчиларнинг бу борада асабийлашишларини тушуниш қийин. Атрофда хоинларнинг тарафдорлари шунчалик кўп эканлигини билмаган эканман! Энди қарасам, Баҳром Ҳакимов ҳам шу мавзуни кўтарибди… 

Агар Баҳром Ҳакимов: “У (Бобомурод Абдуллаев – Б.А.) мағлубиятга учралган ўйинларда футболчиларни ўйинларни сотганликда ҳеч бир исботсиз ва ноҳақ айблаб, турли мақолалар ёзганди”, - деган гапи билан www.xorazmfk.com “Хоразм”да тозалаш ишлари давом этмоқда” сарлавҳали хабарни назарда тутаётган бўлса, мен мазкур материални клубнинг расмий хужжати, яъни 2010 йил 1 июньдаги йиғилиш баёни ва унда чиқарилган расмий қарорга таяниб чиқарганман. 

Менда ушбу хужжатнинг ксеронусхаси бор. Агар ишонмасангиз, ушбу баённинг сканердан чиқарилган фотонусхасини www.xorazmfk.com сайтининг “Fotogalereya” бўлимига ташриф буюриб ёки uff.uz сайтининг тегишли ҳаволасини босиб, ўз кўзингиз билан кўришингиз мумкин. 

1 июньдаги йиғилиш баёнидан бир парча келтираман:

“Хоразм” жамоасининг бош мураббийи В. Султанов ўз сўзида жамоамиз футболчилари Файзиев Даврон, Пўлатов Маъруфларни чемпионат биринчилигидаги айрим ўйинларда (“Локомотив” Тошкент, “Пахтакор” Тошкент, “Шўртан” Ғузор) жамоаларига қарши ўйнаганда номаълум (эътибор беринг: НОМАЪЛУМ!!! – Б.А.) ҳатти-ҳаракатлари сабабларига кўра, ўйин кўрсатгичига салбий таъсири ва жамоанинг ютқазишига олиб келганлиги ва бош мураббий Вали Султанов учрашувдан кейин ечиниш хонасида ўйинчиларга, яъни Даврон Файзиев, Маъруф Пўлатовларга қилган қўпол хатоларини айтганда, мураббийга нисбатан ҳурматсизлик қилганини айтиб ўтди. Яна жамоа аъзоларидан Махвиладзе Михаил, Эвертон Дос Чагос “Локомотив” Тошкент ўйини якунидан кейин кўзида ёш билан: “Агарда жамоамизда мана шундай футболчилар бор бўлса, жамоамиз ҳеч қачон тўғри ўйинлар кўрсата олмаслигини ва навбатдаги ўйинларда шундай ўйинчилар қатнашса, улар билан бир сафда ўйнамасликларини” билдирдилар”. 

Эътибор беринг: “Хоразм” футболчилари: “Файзиев ва Пўлатовлар ўйнаса, биз улар билан бир сафда майдонга тушмаймиз!” - деб, шарт қўйишган. Мен шу мажлисда иштирок қилгандим, ҳалол ва “Хоразм”га садоқатли футболчи Михаил Махвиладзенинг йиғламсираб гапирганлари ҳалигача кўзимнинг олдидан кетмайди.  

Баҳром ака, кўряпсизми: “Хоразм” жамоасининг ички муҳитини мен, матбуот котиби эмас, балки баъзи футболчиларнинг ўзлари бузиб юришган ўйинлар пайтидаги “антиқа” қилиқлари билан! Акс ҳолда, Махвиладзе, Эвертон каби футболчилар: “Сафимизда фалончилар ўйнашса, биз майдонга тушмаймиз!” – деб ультиматум қўйишармиди?! Сиз бўлсангиз: “Матбуот котиби клубнинг ички муҳитини бузиб юрган”, - деган иддаоларни қилибсиз. Тағин, ўйинлар пайтидаги “номаълум” қилиқлари билан жамоадошларининг норозилигига сабаб бўлиб, “Хоразм”дан ҳайдалганларни жамоага қайтарганингизга ўлайми?!  

Энди шу мажлис қарорини айнан келтираман:

“Мажлис қарор қилади: “Хоразм”П.Ф.” МЖЧ футболчилари: Даврон Файзиев, Холмуродов Зафар, Пулатов Маъруф, Жўраев Комиллар билан 2010 йилда тузилган шартнома муддатидан олдин бекор қилинсин”. 

Энди, Баҳром ака, менга айтингчи, ҳали сиз “Хоразм”га келишингиздан олдин клуб футболчилари ва раҳбарияти сизнинг ёқимтойларингизни жамоадан четлатиш ҳақида махсус йиғилиш ўтказиб, бу ҳақда расмий қарор чиқаришса, айб мендами? Ўша пайтдаги клуб директори ва бош мураббийи Вали Султонов мендан ушбу хужжат асосида хабар тайёрлаб, клуб сайтига жойлаштиришни сўраган бўлса, мен шу топшириқни бажарган бўлсам, айбдорманми? Ёки ўша пайти ҳам мен Вали Султонов қолиб, Сизнинг топшириғингизни бажаришим керакмиди? Ахир, унда сиздан дарак ҳам йўқ эди-ку! Ёки ўшандаёқ “Хоразм”га бош мураббий бўлиб келишни режалаштириб юрганмидингиз? “Хоразм”га келишингизни тушимда кўрибманми?!  

”Хоразм”да тозалаш ишлари давом этмоқда”, - деган хабарни мен бояги йиғилиш баёнига асосланиб ёзганман, лекин ўшанда ҳам ҳеч бир футболчини сотқинликда айбламаганман. Мен уларнинг нима сабабдан жамоадан четлатилганини ёзганман холос. Ва ёзганда ҳам, бояги йиғилиш баёни ва қарордан келиб чиқиб ёзганман.  

Лекин сиз, Баҳром ака, 24 август куни uff.uz сайтига берган интервьюнгизда мен ҳақимда: “У мағлубиятга учралган ўйинларда футболчиларни ўйинларни сотганликда ҳеч бир исботсиз ва ноҳақ айблаб, турли мақолалар ёзганди”, - дегансиз. Энди ўзингиз шу гапларингизни исботлаб берасиз!  

Бундан ташқари,  24 август куни uff.uz сайтига берган интервьюсида Баҳром Ҳакимов: “Мен унинг (Бобомурод Абдуллаевнинг – Б.А.) "Хоразм" клубининг уй ўйинларига келмаслигини талаб қилиб, клуб раҳбариятига билдиришнома ёзмаганман. Клубнинг бу ҳақдаги чиқарган буйруғига менинг ҳеч қандай даҳлим йўқ”, - дебди. 

Бу қанақаси бўлди?! 10 августдаги 40-К сонли буйруқда: “Исходя из трудного финансового положения ФК «Хорезм» и требования главного тренера Бахрома Хакимова, приказываю пресс-атташе клуба Бобомуроду Абдуллаеву не приезжать из г. Ташкента в г. Ургенч для посещения домашних игр ФК «Хорезм», для выпуска буклетов и организации послематчевых пресс-конференций. Также приказываю Бобомуроду Абдуллаеву работать в качестве пресс-атташе ФК «Хорезм» только в г. Ташкенте”, - дейилган-у!  

Шу матннинг ўзи ушбу буйруққа алоқангиз борлигига исбот эмасми? Ёки клуб директорига шундай хужжат чиқаришни буюрганда буюриб қўйиб, энди буйруқ ҳақида мақола чиққач, ҳамма ёқда шов-шув бўлиб кетгач, ўзингизни олиб қочяпсизми? Ёши 60дан ошган бечора Оллаберган ака Матниёзовни “под удар” қўяяпсизми? 

Бу буйруққа Сизнинг алоқангиз бўлмаса, ушбу буйруқ мазмунини тушинтиришни сўраб борганимда нега Сиз менга: “Ие, мен бундай буйруқ чиқаришга кўрсатма бермаганман”, - демадингиз? Нега ўшанда: “Бу ерда сизнинг хизматингизга эҳтиёж йўқ! VIP-ложа аҳлига ва журналистларга бериладиган буклетларни ўзимиз сиссиз ҳам чиқараверамиз, жамоалар таркибини бу ердаги журналистларга менинг ўзим айтаман. Матбуот анжумани ташкил қилиш учун матбуот котибининг кераги ҳам йўқ, чунки журналистларнинг ўзлари келаверади ўша анжуманга. Газеталарнинг ва ПФЛнинг журналистларига эса жамоа ҳақидаги маълумотларни фақат менинг ўзим етказаман”, - дедингиз? Ушбу гапларингиз билан сиз қайтанига буйруқ мазмунини, унга алоқадорлигингизни тасдиқладингиз-ку! 

Uff.uzга берган интервьюнгизда: “Мен унинг (Бобомурод Абдуллаевнинг – Б.А.) "Хоразм" клубининг уй ўйинларига келмаслигини талаб қилиб, клуб раҳбариятига билдиришнома ёзмаганман”, - дебсиз. 

Қачондан бери топшириқларингизни ёзма билдиришнома (рапорт) билан қиладиган бўлиб қолдингиз?! Ахир, мени “Хоразм” ФК ошхонасидан ёзма билдиришнома (рапорт) билан ҳайдаб чиқармадингиз-ку! Оғзаки равишда массажчи Валерий Юсуповдан айтиб юборгандингиз-ку! Ёки Валерийга оғзаки топшириқ берганингиздан ҳам тониб, айтганингизни қилган бечора Валерани ҳам “под удар” қўймоқчимисиз”? Мени Тошкентдан Урганчга келмаслигим ҳақида буйруқ чиқартираётганда ҳам клуб раҳбарига билдиришнома (рапорт) ёзмаган бўлсангиз ҳам, оғзаки кўрсатма бергандирсиз. Яхшилаб эслаб кўринг! 

Интервьюнгизда: "(Бобомурод Абдуллаевга – Б.А.) Сизсиз ҳам матбуот анжуманини ўтказдик, агар ўйинларга келишни хоҳламасангиз, келмай қўяверинг" дегандим”, - дебсиз. Роса юмшатиб, юмалоқ ёстиқ қилиб юборибсиз-ку айтганлирингизнинг аслини! Айтганларингиздан қайтаяпсизми, Баҳром ака?! Майли, тепада Аллоҳ, ерда гувоҳлар ва далиллар бор. Улар шоҳид ўшанда нима деганингизга! Судда эшиттириб, ёдингизга соларман нималар деганингизни! 

Ушбу мақоламнинг сўнггида шуни айтмоқчиман-ки, мен ҳали ҳам “Хоразм” ФКнинг матбуот котиби лавозимида ишлаяпман, ҳеч ким мени ишдан бўшатиш тўғрисида буйруқ чиқармаган, менинг ўзим ҳам клубдан кетиш ҳақида ариза ёзмаганман. Яъни, мен ушбу факт, яъни “Хоразм” ФКда 40-К сонли буйруқ чиққани ҳақидаги мақолаларни клуб матбуот котиби бўлатуриб ёздим. Баъзи ўқувчилар ва мухлислар билиб-билмасдан гапираётгани каби, ишдан бўшаганимдан кейин ёзаётганим йўқ. 

Энди бу мавзуни нима мақсадда матбуотга олиб чиққанимга келсак. Бу ишни қилаётганимда мен қуйидаги мақсадларни кўзлаб ёзганман: 

1. “Хоразм” ФКда чиқарилган “антиқа” буйруқ ва Баҳром Ҳакимовнинг менга муносабати мисолида ўзбек профессионал футбол клубларида матбуотга ва матбуот котибларига бўлган асл муносабатларни кенг оммага кўрсатиш; 

2. “Хоразм” ФКда чиқарилган ушбу буйруқ ташаббускорлари ва муаллифларини расмий жазога торттириб, бошқа клубларда бу каби ҳоллар рўй беришининг оз бўлса-да олдини олиш ва матбуот котибларига бўлган муносабатни сал бўлса ҳам яхшилаш. 

Бу муаммоларни ўзимнинг мисолимда ёритишга мажбур бўлдим, чунки бошқа ҳамкасбларим ўз мисолларини ёритишимга қаршилик билдиришган. Хусусан, бундан 4 ой олдин бир клубда ишлайдиган ҳамкасбимни ўша клуб бош мураббийи (эътибор беринг, клуб директори ёки вице-президенти эмас, яна бош мураббий!) менинг кўз ўнгимда уятсиз гаплар билан ҳақоратлаб ташлади. Ўша ҳамкасбимга: “Ахир, бош мураббийнинг матбуот котибининг ишига аралашишга ва ҳақорат қилишга ҳаққи йўқ-қу! У ўзининг тернировкасини қилмайдими?! Келинг, мен шу ҳақида мақола ёзай, бошқа мураббийларга ҳам огоҳлантириш бўлади”, - деган таклифни қилдим. Аммо ўша ҳамкасбим: “Қўйинг, мен бу ерда тинчгина ишламоқчиман, менга ёзув-чизувнинг ва интригаларнинг кераги йўқ”, - деб, ўзини четга олди ва ориятини ҳимоя қилишдан кўра, мураббийлардан ҳақоратланиб юришни, учишдан кўра судралиб юришни афзал билди. Бундай журналистларга учиш учун қанот берсанг, “Бу берган қанотингиз судралиб юришимга ҳалақит қиларкан!” – деб, қанотдан ҳам, учишдан воз кечишади.  

Шундай экан, мен матбуот котибларига бўлган муносабатни, баъзи клубларимизнинг бош мураббийлари ўзини мураббий эмас, клуб хомийси ёки президенти каби тутиб, ўз хизмат ваколатларидан ташқаридаги ишларга ҳам буринларини тиқаётганларини ўзимнинг шаҳсий мисолимда кўрсатиб беришга мажбур бўлдим. Яъни, мен матбуот орқали ўз шаҳсий муаммоларимни ҳал қилаётганим йўқ.  

Энди, баъзи “билағон” мухлислар ва журналистлар учун яна бир маълумот. Мен ушбу факт, яъни “Хоразм” ФКда 40-К сонли буйруқ чиққани ҳақида, “Чемпион” газетасига ва www.xorazmfk.com сайтига мақолалар ёзиб қолмасдан, Ўзбекистон Профессионал футбол лигаси бош директори Фарҳод Магометов номига алоҳида шикоят аризаси ҳам ёздим. Ушбу аризани 24 август, сешанба куни эрталаб ЎзПФЛ девонхонасига топширдим. ЎзПФЛ ходимлари менинг шикоятимга 403-чи кириш рақамини қўйиб, қабул қилишди. Так что, ҳамкасбим Қаҳрамон Асланов Фарғонада ўтириб: “Бобомурод Абдулла ушбу буйруқ ҳақида ПФЛга расмий шикоят ёзмаган”, - деб ҳавотир олмаса ҳам бўлади.   

Дарвоқе, ушбу можарони матбуотда ва интернетда мақола тарзида ёритишимни айнан ЎзПФЛ ходимлари қўллаб-қувватлашди. Улар ҳам бундай муаммолар чўзиб юрилмасдан,  дарров матбуотда ёритилса, тезроқ ечимини топишига, бошқа клублар раҳбарларига ва улардаги мураббийларга огоҳлантириш бўлишини таъкидлашди. Так что, “Нима кераги борди бу муаммони матбуотга олиб чиқиб”, - деб, кўп ҳам куйиб-пишаверманг, Қаҳрамонбой! 

Бобомурод АБДУЛЛА